HAFATRA ANDRO NIAKARANA
Ry havana malala,
Miarahaba antsika omen’ny Tompo izao Andro firavoravoana lehiben’ny ANDRO NIAKARANA izao, izay ahatsiarovantsika ny niakaran’I JESOA KRISTY Tompontsika tany an-danitra, 40 andro
taorian’ny nitsanganany tamin’ny maty, ka anafarana antsika hoe:
« katsaho ny zavatra any ambony, any amin’ny itoeran’i Kristy, Izay mipetraka eo an-tanana ankavanan’Andriamanitra.2 Salno ny zavatra any ambony, fa tsy ny zavatra ety an-tany! »
Tsy maintsy ambara fa toa hadinodinon’ny sasany amintsika ny maha zava-dehibe ity ANDRO NIAKARANA ity noho izy tsy mba andro Alahady. Kanefa ny maha andro andavanandro azy dia tsy tokony hanamaivanantsika azy mihitsy; ny fanjakana aza efa nanao azy ho andro tsy fiasana mba hahafahantsika mivavaka hiaina izay ambaran’ny Tenin’Andriamanitra hoe:
« katsaho ny zavatra any ambony, any amin’ny itoeran’i Kristy, Izay mipetraka eo an-tanana ankavanan’Andriamanitra.2 Saino ny zavatra any ambony, fa tsy ny zavatra ety an-tany! »
Ny tantaran’ny famonjena manko dia toy ny fiarakodia iray misy kodiarana efatra, dia ny Krismasy, ny Paska, ny Andro Niakarana ary ny Pentekosta. Mifameno tanteraka ireo:
- tamin’ny KRISMASY dia tonga nofo teto an-tany hamonjy antsika olombelona mpanota tamin’ny alalan’I JESOA Andriamanitra;
- tamin’ny PASKA dia maty sy nitsangana tamin’ny maty ho fanatanterahana izany famonjena izany i JESOA ;
- tamin’ny ANDRO NIAKARANA dia niakatra ho any an-danitra hanokatra ny lanitra hidiran’izay rehetra mandray ny famonjena nataony I JESOA,
- tamin’ny PENTEKOSTA dia nandatsaka ny FANAHY MASINA ho tombo-kasen’ny olom-boavonjy sy ho fanafiana hery azy hijoroany ho vavolombelon’ny famonjena vitany Andriamanitra Ray sy i JESOA!
Koa tena zava-dehibe ny niakaran’I JESOA ho any an-danitra hanatanterahany ilay fampanantenany hoe:
» 2 Ao an-tranon’ny Raiko misy fitoerana maro; raha tsy izany, dia
efa nilaza taminareo Aho; fa handcha hamboatra fitoerana ho anareo Aho.3 Ary raha handeha hamboatra fitoerana ho anareo Aho, dia ho avy indray ka handray anareo ho any amiko, ka izay itoerako no hitoeranareo koa. » (Jao.14,2-3)
Koa na inona na inona lalovantsika ety an-tany, tandremo sao variana amin’ny fifalian’ny tany, na ny fahorian’ny tany, na ny volan’ny tany, na ny voninahitry ny tany, na ny fahefan’ny tany, dia ho voan’ny tamberin-tany; ka hanadino ny hafatra hoe:
« katsaho ny zavatra any ambony, any amin’ny itoeran’i Kristy, Izay mipetraka eo an-tanana ankavanan’ Andriamanitra.2 Saino ny zavatra any ambony, fa tsy ny zavatra ety an-
tany. »(Kol.3,1-2)
HO VONINAHITR’ANDRIAMANITRA IRERY IHANY! Amen.
Faravohitra, Andro Niakarana Mey 2023
IRAKO ANDRIAMAHAZOSOA Ammi, Mpitandrina
Filohan’ny FJKM
HAFATRA PENTEKOSTA 2023